ایسلتمه

قوییده گی شعر 1965 میلادی، 1343هجری ییل، 22 د لو آیی، جمعه کونی، سرپل شهری نینگ بوغاوی "بوغا یی" قشلاغیده، اوز ایکین زارلری اوستیده، "نا قلین خانلری" تامانیدن وحشیلرچه آتیلگندن کیین، تیریکله یین کتته النگه ده کویدیریب اولدیریلگن آلتی ته اوزبیک و تاجیک دهقانلری فاجعه سی مناسبتی بیلن یازیلگن ایدی. تأسف بیلن ایتیش کیره ک که شعرنینگ یازیلیشی و فاجعه نینگ تاریخی، "یورک سرلری" شعرلریم توپلمیده نا توغری شکلده 1954 میلادی و 1332 هجری ییل دیب نشر ایتیلگن.

مرحوم شهید لر قوییده گیلردن عبارت ایدی:

1- مرحوم محمد قل، 2- مرحوم ملاشریف، 3- مرحوم احمد، 4- مرحوم یادگار، 5- مرحوم غلام قادر، 6- مرحوم عبدالواحد. بولردن تشقری توققیز دهقان قتتیق یره لنگن ایدی.

حاضر اوشبو الملی فاجعه دن 46 ییل اوته دی. بیز اونی خلقیمیز حیاتیده یوز بیرگن سانسیز قیغولی فاجعه لردن بیری صفتیده حرمتلی وطنداشلریمیزگه ایسله تیش اوچون، مرحوم شهید لرواولرنینگ ایریم عایله لری صورتلرینی، اوشه زمانده محترم ژورنالیست غلام نبی خاطر تامانیدن نشر بوله دیگن "پیام امروز" جریده سی نینگ 1344 ییل 21 حمل سانیدن اقتباس قیلیب، اوشه شعر بیلن بیرگه نشر ایته میز.

خلق دردی

ییغله سم ایککی کۉزیمدن آقیزیب مین یاشلر

سوو بۉلیب آققه­ی چیدالمسدن بو تاغ و تاشلر.

بیر من اېرمسمن کۉنگول بیرگن سینگه ای سیوگلیم

جان و دلدن عاشقینگ دورلر قریلر، یاشلر.

تنگری اولدین بیلردی عشق اېلین اۉلدورگوسین

شو سببدن بیردی او سینگه قیلیچدېک قاشلر.

سۉیله گیل سیومه­ی بۉلرمو سین کبی طنازنی

کیم اۉتر بۉلسنگ اېگیلگه­ی یۉللرینگده باشلر.

اې گۉزه­ل هجرینگ چیکردیم لیک نیلای عاقبت

آلدی میندن خلق دردی طاقت و برداشلر.

قانگه تۉلدی کۉنگلیم اېل نینگ آغیر احوالین کۉریب

چونکه تقدیری بیلن اۉینر نیچه اوباشلر.

تا "بوغایی" اوستیده یاغدی مصیبت یاغمیری

ظلم اۉتی بیرلن توتشتی "سرپل" و "لولاش"لر

غفلت اویقوسیدن اویغانینگ وطنداشلر کیلینگ

قۉیدیلر مقصد ساری آلغه قدم یۉلداشلر

کیم اېدیک تاریخده بیر کون، نه بۉلدیک عاقبت

اې ستم آستیده قالگن بینوا قرداشلر

تیکله­گین قدینگنی، سیندیر عیش و عشرت کاسه سین

اۉزگه لر ایلگی نینگ آستیده قالر عیاشلر

الپ سن، اېسکی جهان تاریخیده سین ارسلان

همتینگگه عالم اهلی کۉب دېگن شاباشلر

علمینگ اۉتیدین بیر اوچقون "کۉرگانی جدولی"

"آقسرای" و "تاج محل" فضلینگ اوچون پاداشلر

تیکله دی شرق اویغانیش دورین "نوایی" همتی

بو یوتوقلرنی چیزیب قالدیردیلر نقاشلر

حکمتینگ انواریدن "فارابی" دور یارقین مثال

بیردی عالمغه تفکر مطعمیدن آشلر

اې اولوغ خلقیم، اولوسیم، اې اېلیم، اې ملتیم

بیرلشیب تشله­نگ قدم، اې کیکسه لر، اې یاشلر!

شرعی جوزجانی